என் டர்ர்ர்ர்ர்ர்ர் கவிதைகள்

ஒரு கவிதையில் இரு கவிதைகள்


முந்தைய இரவின்
முயக்கம் தீராத
காதல் திருமண ஜோடியின்
கண்களிலும் முகத்திலும்
வழியும் சிரிப்பு

சுற்றி நிற்கும்
ஆண் கூட்டத்தை
பொருட்படுத்தாது
பசி தீர்த்த அன்னையின்
முகம் பார்க்கும்
மழலை சிரிப்பு

கொட்டும் மழைக்காய்
அரைமணி ஒதுங்கிய
பெட்ரோல் பங்கிலும்
காணக்கிடைக்கின்றன
சில கவிதைகள்




ஆளுக்கு ஒரு உலகம்


அண்ணி வீட்டு கடிகாரம்
அரைமணி அதிகமாய் காட்டும்,
ஆசிரியராய் அவர் இருக்கும் - பள்ளி
ஆரம்பிக்கும் நேரமது

எதிர்வீட்டு கடிகாரம் எப்போதும்
இருபது நிமிடம் முன்செல்லும்,
ஆலை சங்கொலிக்கும் முன்,
அங்கிருக்க வேண்டுமென்கிறார் அவர்

இக்கவிதை (!!) வரிகளை மனதில் ஓட்டியபடி,
சைக்கிளை மெதுவாய் ஓட்டியதால்,
கிளம்பிய ரயிலை ஓடிவந்து
பிடிக்கும்போது தான் தோன்றியது

ஒவ்வொருவருக்கும்
உலகம் மட்டும் வெவ்வேறல்ல
அவை இயங்கும் நேரங்களும்
தனித்தனி என்று




எதிர்க்கவிதைகள் வரவேற்கப்படுகின்றன (இவை கவிதை என்று நீங்கள் ஒத்துக்கொள்ளாவிட்டாலும் பரவாயில்லை), உண்மை கவிஞர்கள் இவற்றை திருத்தி எழுதினாலும் நலம்


நன்றி
சங்கர்